ಮೊಂಬತ್ತಿ ಬೆಳಕಿನಲಿ ನೀ ನಡೆದು ಬಂದೆ
ಜರತಾರಿ ನೀಲಿ ಸೀರೆ ನೀನುಟ್ಟು ನಿಂದೆ !
ಉಬ್ಬಿದ ಹುಬ್ಬು ತುಂಬಿದ ನಗು ಮೊಗದಲಿ
ಕೈಯಲ್ಲಿ ಸೀರೆಯ ನೆರಿಗೆ !
ಪಾದವ ಆವರಿಸಿ ಗೆಜ್ಜೆಗಳ ಬೆಳ್ಳಿ ಸರಿಗೆ !
ಇಂಚಿಗೊಂದು ಪಾದ ಬೆಳೆಸಿ ನಿನ್ನ ಸವಾರಿ
ಸಾಗಿತ್ತು ಎನ್ನೆಡೆ ಇಲ್ಲದೆ ಯಾರ ರುವಾರಿ
ಏನದೋ ಬಿರಿದ ತುಟಿ ತುಂಬಾ ನಗುವು
ಹಲ್ಲು ತೋರಿ ನಗುವ ಸಣ್ಣ ಮಗುವು !
ಕಣ್ಣು ಪಿಳಿಪಿಳಿಯಾಡಿಸಿದೆ ಒಂದೆಡೆ ನಿಲ್ಲದೆ
ಯಾವುದೋ ತುಮುಲದಲಿ ಎನ್ನ ಹುಡುಕಾಟದಿ
ಸೆರಗಿಗೆ ಮೆರಗು ಕೊಡಿಸಿದೆ ಇನ್ನೊಮ್ಮೆ ಸರಿಪಡಿಸಿ
ದೃಷ್ಟಿಯ ನೆಟ್ಟಿದೆ ಓಮ್ಮೆಲೆ ನನ್ನ ಮೇಲೆ !
ಸೋತು ಹೋದೆ ನಾ ನಿನ್ನ ನೋಟಕೆ
ಸೌಂದರ್ಯದಾಟದಿ ಬೆರಗಾದೆ ನಿನ್ನ ಮಾಟಕೆ
ನಿನ್ನ ಸಿಂಹ ಕಟಿಯ ಬಳಸುವ ಬಯಕೆ
ನಿನ್ನ ಜೇನಿಗೆ ದುಂಬಿಯಾಗಲೇ ಓ ನನ್ನಾಕೆ !
-ಅಕುವ
೨೭/೦೭/೧೯೯೯
(ಇದು ಮುಂಬೈಯಲ್ಲಿ ಬರೆದ ಮೊದಲ ಕವನ)
No comments:
Post a Comment